Vitason's Blog

退休生活。

Wed, 07 Mar 2012 22:32:19 +0800

終於可以親親好耐無見的「假期」，晨咁早起身練下琴，練下 Scale 再彈下要重練個首小步舞曲，新個首歌仔掂左少少。跟手玩左一陣「Orochi 2」就落銅鑼灣飲茶。有款熊貓點心都幾得意，大家估下是甚麼 ↓

原來係一個奶黃包。究竟奶黃包同熊貓有乜關係呢？百思不得其解！咬下咬下，一個死剩把口、另一個死剩個籮友 ↓

趕得切優惠時段前結帳，平少少咁。行下街吹下水咁，本身想買新出既 Thousand Sunny 既模型船，佢剛剛出個陣見過，點知隔幾日後再搵就唔見 ... 天意。買唔到船就去買 Toner。講起就頹，話說部 Color Laser Printer 大半年無用，想話用黎印少少野，點知印出黎既色水褪色，打電話去 Hotline 又解決唔到。最主要原因係過左保養。我自己就懷疑係連住 Toner 既「鼓」有固障，所以唔出色。之前換左支黑色，今日再買支黃色試下。一支成五舊水，換晒的話仲貴過一部新 AIO Inkjet ... 真係越窮越見鬼。

如是者就返去香港仔打下羽球，整個場得我地兩個打 ↓

可惜 ... 強度不夠。無他 ... 朋友仔係呢方面一般般。寄望泳池重開個陣去游水，等佢威下。打完波買左少少茶點比自修中既學生吃，吹下水咁，跟手回家 Hea 左陣繼續打機。終於打到經典一幕 ↓

如是者 ... 一天就過去了。難得健康的休假。

That’s All/

精彩的一天暨呃相影

Thu, 01 Mar 2012 22:36:08 +0800

好耐好耐好耐無打日記，唔係話生活唔精彩，都唔係話忙到打幾隻字都唔得，只不過比個 D 旅行日記「擲」住。本身好想打好晒 D 遊記先再加「普通」日記，只不過搞左咁耐都只係打左三日咁大把，要打晒前後二十幾日真係「希望工程」。

話說今日真係好精彩，真係好精彩。本身諗住朝早七點零起身練下琴仔，但實在太眼睏加上又潮潮地濕，都無乜意欲起身練，本著「賴皮」既心態去上堂。九點上堂，九點二先去到。一去到講起話我好少遲就再講起睡眠不足，之後再講起學生睡眠不足，講下講下同琴老師講到話有能力的話不如比個女試下讀國際學校，講下講下講到九點半先彈第一粒音，Hea 彈 Scale，再彈五月微風七月林峰，順利碌過。跟住又唔知點解又停落黎繼續講子女教育，無啦啦講到喜羊羊教壞細路，又講左一陣之後再彈一首小步舞曲。老師就彈到好小步，我就彈到沉重腳步，難。彈左兩次之後又吹多陣水就夠鐘。如是者阿同學仔就緊接上堂，我落堂佢上堂前我地問老師我地三個投唔投契，繼而講了 Michelle 和舞蹈老師投契而不用學費的故事。琴老師大驚，最後當然唔會有免費堂上，哈。聽返同學仔講，佢上堂個陣琴老師繼續同同學仔傾佢個女既事宜，其實我地呢堂應該唔收學費先係，琴老師先係受助者。

如是者返工，到午飯時間，Kari 來了學校 Lunch 順道之後作講座分享嘉賓。佢的加入，令到原先已經很熱鬧的 Lunch & Talk 更加熱鬧。真係幾高興！熱鬧過後無耐，好耐好耐好耐無見的 MT 入來 Talk & Talk。其實就唔係真係好耐無見既，上上個禮拜一先見完，但好似幾年前識去到依家未同佢面對面傾過計，佢把聲係點都無印象。一次過傾左幾年既計，希望之後還有機會再傾。如是者兩位就到「隔離」分享，佢地分享完之後就把握機會同才子才女影相，遲下曬返張相去拎個簽名！哈哈，我係呃相影。 ↓

如是者就到團契時間，飲飲食食傾下計畫下野唱下歌祈個禱，看看以下呢張相估唔估到今次主題是甚麼 ↓

係「試前祈禱會」 ... 當中參與者的狀態有「健忘」、「垂死」、「混亂」、「彌留」、「疲乏」、「失神」及「無奈」。

遲左走遲左撘車，之但係又無乜點塞車，只不過差 D 睏過龍唔記得落車。一睜開眼已經見到其他乘客落緊車，好彩。去到九龍塘還有多少時間，辦理少少事宜就上堂去。上堂無乜特別，但遲左落堂。剛巧愛人又遲左收工，如是者便相約在香港仔 Late Dinner，邊吃邊傾，咁就一 Day。之但係 ... 我做左一件事對唔住愛人，就係 ↓

我買了新 Game，哈哈哈哈哈哈哈哈哈哈哈哈哈！

That’s All.

五週年‧瑞士遊 Day 3 - Interlaken 恩特拉根

Thu, 29 Sep 2011 12:54:38 +0800

今天因為要穿州過省，所以都早 D 起身抓緊時間展開旅程！其實尋日朝早吃早餐已經好有驚喜，今日再次延續驚喜。其實每次去旅行都對酒店包既早餐無乜特別興趣，一來晨咁早起身無耐無胃口，通常都無乜野岩吃、二來吃酒店早餐規限左幾點至幾點，想話睏晏 D 都唔得。所以通常訂酒店都揀 D 唔包早餐既 Package。之但係係瑞士，好難搵唔包早餐既 Package，亦因為咁先遇到驚喜！這就是連續兩朝的早餐組合，餐檯餐具都好「骨子」 ↓

咁會吃 D 乜呢？就是以下，看似好平常，但真係好好味 ↓

先吃一兩個麵包，而呢間酒店買回來既牛角包係超超超超超超好味，第一次吃到咁好食既牛角包！好鬆軟啊！再加幾片凍肉，正！我自己鍾意奶類製品，會吃杯瑞士 Emmi 乳酪、再吃多碗牛奶栗米片。最後飲多杯橙汁！呢個份量既早餐夠晒飽，如果自己係街買都可能要 CHF 20，依家只係大約十零蚊 CHF，都抵仔。同埋可以晏 D 先吃或者唔吃 Lunch，哈！其實早餐其間都有段小插曲，因為瑞士自來水可直接飲用既關係，房間內係無熱水煲，要飲只有水喉水。飲慣煲過既水又點會突然間習慣飲水喉水呢？咁見到酒店早餐 Buffet 個位有壺水，當然鬼鬼崇崇咁拎個水樽出來沖水。但依家諗深一層 ... 話唔定個壺水都係水喉水 ...

吃完早餐回房間拎行李準備 Check-Out，臨走前仔細看看洗手間內的燈箱，驚見很多蚊 ↓

其實都有原因既，之前咪講過間房無冷氣既，無冷氣就自然要開窗啦，但開窗就一定多蚊蟲。咁都聰明地帶左 D 香茅包都驅蚊蟲，一個放床頭、一個放窗邊。可能新開的關係，非常有效，一開房門就聞到個陣香茅味，哈哈。咁 D 蚊蟲飛去邊呢？咪就係飛入去遠離香茅包的洗手間，再加上入夜其實都涼涼地，D 蚊就飛去光管，叫做暖 D，不過其實我發現都好多蚊被光管「照死」左。睇完 D 嘔心野，就正式離開呢間住得高興、吃得驚喜的三星酒店。咁就坐火車往 Bern 再轉車到 Interlaken。第一程車有位坐很高興，但第二程就無位了 ... 唯有咁樣 ↓

渠仔都黑面話點解唔去上層睇下有無位，之但係，佢個件就話輕唧，我個件行李又大件又重，佢真係講得輕鬆了。之不過有時 D 野就係咁，未如人意並非一定係壞事。點解咁講呢？因為正正坐係門口位附近，先有個大窗望到影到車外風景。如果坐普通話就睇唔到了，湖中的帆船 ↓

湖邊小屋，都幾好 Feel ↓

十一點零鐘就去到 Interlaken，個車站都很簡單，係咪好似無乜特別呢 ↓

其實車後面便是延綿不斷的山岳，都咪話唔誇張 ↓

山區觀光市鎮，少不免有 D 較有特色的交通工具，以下便是馬車 ↓

唷噢！這便是四星級的 Hotel Royal St. Georges，住兩晚，係咪好華麗呢。呢間酒店住既房係全個旅程最貴的！一晚房租要兩千幾 ... ↓

整間酒店很有歐洲建築特色，呢間酒店係 Historic Hotel，1908 年建成。但記住喎，有歷史價值唔等於一定係高星級酒店。好多時正正因為係有歷史價值所以未必有重大翻新，反而可能會殘舊 D。亦因為咁，酒店設施都因為酒店規模所限而跟不上其他新落成之酒店 ↓

拎房匙後，行過一條空中走廊。嗯，乜間房唔係係頭先咁華麗既建築物內嗎？原來間房位於隔離呢幢建築物。哈，一起歡喜一場空 ↓

心情好像過山車，入到房又好有驚喜喎，係好靚的一間房 ↓

檯上的 Welcome Drink 由 Check-In 到 Check-Out 都無掂過，唔知點解個陣意識唔到佢係 Welcome Drink。檯上面個本小冊子就係介紹瑞士有邊 D 係 Historic Hotel ↓

用來吹水、Hea 的角落 ↓

還有一個露台，如果飲酒、吃煙的話，呢個位真係幾正 ↓

望出去有間小屋、有坐山，個景都算唔錯。就咁睇就知環境寧靜啦，好有度假 Feel↓

另一個令我驚喜的地方是個浴室好 Modern 好 Stylish，可以浸浴花曬浴。最特別係浴缸隔離有隻窗。幻想下浸住熱水打開些少窗望星星既情景幾 Relax ↓

呢間酒店有幾款 Relaxtion，之但係每樣都要預先去 Book，咁就有多少唔方便咁啦。本身渠仔話想去，但我見咁麻煩就勸佢唔好試，係咪好衰呢 ↓

係間房四圍影相後，點都估唔到接下來的活動是「洗衫」... 我都唔知點解個刻會去洗衫，可能見有 D 時間，而且早 D 洗衫可以早 D 乾掛，至記得我洗左條 OK 厚既牛仔褲。洗完就勾晒係洗手盤滴下水等乾。都咪話，都花左差唔多成個鐘去洗衫掛衫。又到午飯時間，係車站旁有 Coop City，就打算係個度既 Food Court 吃 Lunch。有左先前既經驗，咁諗住實無死啦，一定可以好 Smooth 咁揀野吃。點知到比錢個下就出事了！之前食個次係有 Set，但今次原來以重量計錢 ... OMG！開頭諗住係度食會平 D，點知只係比去餐廳平少少，重等我夾左咁多薯條，激死我 ↓

肉腸其實都幾好吃的，渠仔個舊燶燶地唔知乜野食完都唔知係乜野。花錢買左包茄汁，再加左件蛋糕。蛋糕上面插住個「中國仔」好搞笑，係清朝人。哈，其他人見我地揀插左呢款裝飾既蛋糕可能以為呢款裝飾佢吸引到中國人、銷售策略正確。實情特登揀佢來恥笑，明明隻隻中文字我都識，之但係就唔知夾埋點解。都係既，佢騎騎呢呢咁就吸引左我去買佢 ↓

吃完飯都兩點零鐘，咁就係 Interlaken 附近行下。呢個地方最特別就係「有山有水」，之前睇過山，依家睇水。呢條河係叫 The Aare River，貫穿整個 Interlaken再一路流流到去首都 Bern ↓

唔係講笑，係樹底下的確有人坐係度睇水 ↓

另一個笑點就係呢個地盤工地 ↓

點解咁好笑呢，是咁的，呢個工地咁岩佔用埋原本的行人路。但工地就無乜指示話唔行得，我地兩個就跟人行穿過個工地。或者當地人常識係可以隨便經過都唔定，但可以咁樣行入工地真係好少有。行多幾步就見到其中一條火車必經的橋，就是這樣子，係咪好兒戲呢 ↓

向前望是這樣子，一望無際的河 ↓

還有一望無際的鐵路 ↓

如是者行啊行，就準備上山睇雪山，路經一個木雕，都幾得意 ↓

由於時間有限，都要揀 D 精選展望台，咁我地就決定上 Harder Klum 展望台。點解揀呢隻展望台？一來旅遊書有推介，二來地點近酒店，三來有 Pass車費可以有折扣 ↓

原先諗住買個 Pass 都唔應該遇上甚麼問題，但實際上竟然言語不通 ... 竟然漏左搵 Jungfraujoch 既讀音 ... 開時都不以為意，當英文咁讀，咁就當然唔岩啦。搞左一段時間，最後拎本中文旅遊書比 Counter 個位售票員睇，在眾多中文紙堆找到「Jungraujoch Railway Pass」，成了！有 Swiss Pass 有半價，如是者就坐係站頭睇下書抖下咁 ↓

渠仔坐纜車，坐係車長後面。纜車係單軌雙向行車 ↓

山上既樹唔知點解被砍掉了 ↓

話咁快就上到去 Harder Klum，大家睇返之前既相咪話坐火車經過一個湖既。其實就係呢張相左邊既湖，而相片較左下位置便是 Interlaken，眼利的話還見到有人玩緊滑翔傘 ↓

Interlaken 與 Jungfraujoch ↓

有晒圖介紹，只要對岩位就唔會唔知邊座山打邊座 ↓

Eiger、Monch 與 Jungfraujoch 大特寫，很多名信片都是這樣取景 ↓

在 Harder Klum 上有一間 Cafe，就是這間 ↓

其實都唔係第一次見當地人係太陽底下 Hea、吹水飲酒抽煙，但估唔到係山上既一間 Café 都咁多人。另外太陽傘既角度真係好盞鬼，其實本身都有諗過下上來山上 Café 吃個 Tea，但最後種種原因就無既 ↓

影下相 Hea 左陣就排隊撘纜車沖落山，車程雖然短，但因為車箱內有隻大狗入左來，渠 G 就惶恐萬分、戰戰競競咁坐呢程車 ↓

「友好」是無處不在，在 Interlaken 便有一個「友好之庭」。是由日本的姊妹市大津市市長贈送。唔知天氣問題定係本身係咁，都好似好多蚊，影相都要快快手↓

在「友好之庭」後便有一座教堂，整點時會敲鐘，當然，夜晚十二點前都會敲鐘。有遊客於訂酒店網站說這個鐘好嘈，山長水遠來到，當然要睇下 ↓

沿著市大街 Höheweg 由東至左咁行便差不多可以遊歷整個 Interlaken 市鎮，會見到很多酒店包括五星級的 Victoria-Jungfrau、專做遊客生意的商店，商店內有的是曉講普通話的職員，特別係賣錶既部門。以下便是 Interlaken 唯一一間大型賭場 Casino Kursaal Interlaken↓

在街道的另一邊是Höhe-matte，是滑翔傘降落熱點。話分兩頭，個陣時天色真係好靚，不過太陽都比較猛，要墨鏡護眼 ↓

繼續向西行便來到市內另一較大型超市商場，東邊是 Coop City、西邊的是 MIGROS ↓

內裡依然的那麼大，買了兩支平價甜筒 ↓

如是者便由西向東行回酒店，回到酒店時向 Counter 拎風扇，好簡單一個英文字「Fan」，但就可能太簡單，Counter 不明白，如是者唯有先回房再商議一下。在露台向出望，有個很靚的日落，呢兩張相都係回到香港睇返相先見到 ↓

點解個陣時我留意唔到日落呢？以下便是原因 ↓

無他既，個陣我打緊 iPhone 既 StreetFighters IV。At the same time，都因為風扇問題而嘈左幾句，最後決定畫公仔畫出腸，由渠 G 去問 ↓

最後 ... 唔洗出動呢張紙，因為今次 Counter 個位職員識英文，Good！等風扇到就離開去吃晚飯，行左幾行，見到有間餐廳又多人又有英文 Menu，重唔拿拿聲入去坐咩。呢間餐廳叫 Des Alpes，旅遊書都有提及到。同埋其實到夜晚既時候，都真係有多少涼意，一入到餐廳內就暖返晒。唔知係咪因為咁，間餐廳裡面係勁多烏蠅，無錯，係勁多。不過又唔知係咪當地是這樣子，因為見 D 疑似本地人同 D 烏蠅相處好融洽喎，D 烏蠅爬到上去 D 餐台、餐具，疑似本地人都無動於衷。餐廳環境是這樣，我覺得支蠟燭係可以趕烏蠅，哈哈 ↓

以下便是我們今晚的晚餐，都幾豐富啊，起碼我個份係 ↓

Close Up 睇下，上面就係我叫既 Rösti，即係薯仔餅，係典型瑞士山區菜式。呢款有 D 煙肉粒、洋蔥、火腿等。我真係超鍾意食薯仔，Rösti 簡直係人間美品，不過略嫌佢油左少少。渠 G 個款就普通少少了，只係薯條加煙肉芝士包腸仔，原來渠 G 唔係特別喜歡吃薯仔 ↓

我個份 Rösti 吃清晒，渠 G 個份吃唔晒，我幫佢吃左少少，真係飽到上心口。吃完埋單，唔記得幾錢，總之計返港幣唔少錢。回到酒店竟然有禮物收 ↓

係五週年禮物，唔怪得之之前渠 G 唔比我幫佢開件行李啦，係幾有心思，Very Good ↓

最後欣賞一下木地板，今次旅程大多數都揀木地板既酒店，感覺乾淨好多 ↓

還記得今天中午洗左 D 衫褲，最後就掛左係呢個大大既衣帽間，搵把風扇吹住佢 ↓

今天好似無乜特別野做過，但心情豁然開朗，放假應該如此！！

That’s All.

五週年‧瑞士遊 Day 2 - Schaffhausen 夏夫豪森

Wed, 28 Sep 2011 09:51:28 +0800

話說由昨晚七點睏到今朝八點零，雖則話睏左十幾個鐘，之但係都好難還清睡眠債。吃完酒店早餐之後就開始今日行程，來個「找緊時間」的一天。今天的目的地是「Schaffhausen」（夏夫豪森），一開頭當然要趕上火車啦，車程約 40 分鐘 ↓

沿途都天陰陰，同埋都幾大霧 ↓

話咁快就到站，先去旅客中心拎地圖，鄰近的夫隆瓦格廣場（Fronwag-platz）是這樣的，有人坐係度曬太陽。見到餐廳的檯椅都會放晒出街的。如果發生係香港的話，便有人告佢阻街。之但係，話唔定個個露天範圍都歸餐廳既，呢方面我就唔清楚了 ↓

廣場四周是這樣的，有個 Metzger brunnen（肉販噴泉）。噴泉在這裡很常見，唔好以為佢剩係裝飾，見過有人將 D 「泉水」直接飲用，都見過有小朋友係上面玩水 ↓

輾轉經過 Coop City，即係大間 D 既 Coop，內裡有 Food Court。想知道瑞士物價是如何？大家可以計下數，以下呢個早餐 Set 賣CHF 6，港幣四十零蚊。包乜野呢，係有兩個包（牛角包或十字包）、一杯咖啡或茶或柯華田或 Caotina、再加牛油同果醬 ↓

Caotina 係瑞士好出名既朱古力沖劑，當地沖朱古力唔係就咁沖滾水，而係用熱牛奶沖，味道好濃好香！同埋大家覺唔覺得奇怪，點解牛油同果醬都會寫埋落個 Set 裡面呢？其實當地呢 D 「醬」係要另外比錢買，要港幣兩三蚊的。以上種種都係看圖識字，無圖的話就完全唔知餐牌佢寫乜。其實都唔係既，德文都叫做有跡可尋，都估到下意思。例如上面 CHF 1.6 我估係多杯熱飲或者 1dl. 大小既橙汁。

話咁快就行到去「騎士之館」（Haus zum Ritter）。大家唔好意為呢座係一間關於騎士的博物館可以入內參觀，其實佢咁出名都係因為建築物上的Frescoes（濕壁畫）。濕壁畫是甚麼？Google 一下就知了 ↓

顏色咁鮮豔就知呢幅唔係真蹟，真蹟已於 1935年放左係 Museum zu Allerheiligen 保存。建築物是為騎士 Haus 所建，壁畫由當地著名畫家 Tobias Stimmer 於 1568 至 1570 所畫，內容是關於神話故事。現時這個版本是由另一位畫家所修復。哈，呢個景點真係唔講都唔知有咁既歷史，驟眼睇以為係繪上壁畫的普通建築物。再睇下道路兩旁的建築，好多都有 Bay Window。而建築物外牆都有濕壁畫或者雕刻。地面個層名為商鋪 ↓

轉個頭就見到麥當勞，有兩支旗仔插係度，都幾有型 ↓

行多幾步就見到有中餐館，上海排骨飯 CHF 16.5（HKD 150）、羅漢齋飯 CHF 13.5（HKD 120），覺得好貴嗎？錯了，普通貨色也 ↓

再行經一個噴泉，不過就唔知叫乜名了 ↓

唔好睇小呢條小巷，兩旁都有商戶開門做生意 ↓

路經的 Kirche St. Johann ↓

行多幾步就見到 Wilhelm Tell 噴泉 ↓

Wilhelm Tell 係瑞士傳說中既英雄，大家對呢個傳說或多或少都會有 D 印象。睇電視咪好興話皇帝要 D貪臣用頭頂住個蘋果作靶，自己就用箭射落個蘋果。有極大理由相信，同呢個故事有關。來自 Wiki的簡介 ↓

威廉•泰爾是烏里州的一個農民，哈布斯堡王朝在當地實行暴政，新任總督葛斯勒在中央廣場豎立柱子，在柱頂掛着奧地利皇家帽子，並規定居民經過時必須向帽子敬禮，違者將遭到重罰。當時泰爾因沒有向帽子敬禮而被捕，葛斯勒要泰爾射中放在泰爾兒子頭上的蘋果才釋放他們，否則兩人都會被罰，結果泰爾成功射中蘋果。第二箭瞄準葛斯勒總督，泰爾射偏了。當時泰爾回答：「如果我射中兒子，那麼第二箭會射中總督心臟。」總督大怒，將泰爾父子囚禁起來。

暴政仍然持續，於是人民發動起義，泰爾在混亂中逃出來，最後泰爾在一次行動中用十字弓殺死葛斯勒。由於人民反抗，使奧地利出兵鎮壓，不過最終被反抗者擊敗。

如是者繼續向前行就會見到 Schaffhausen 著名景點 Munot（姆諾特城），先行一段梯級，回頭看看剛行過的街道，認得出在相中右方的教堂嗎 ↓

姆諾特城是一個環形城堡，16 世紀建成。入到城內，要先穿過一個地牢似的地方，有幾個大窿透 D 天然光入來。老老實實，都真係幾陰森。試想想，或者現在身處的這個地方曾經是戰場來的 ↓

轉轉轉，轉上去城頂，咁樣望落去都幾 Stylish。不過條路 OK 窄，又再試想想 D 士兵打仗既時候會是怎樣 ↓

上到去城頂就見到護衛塔，呢座塔比城堡有更耐歷史，14 世紀便有。每逢夜晚九點會響鐘，提市民會關城門，當然現在無城門可關啦。 ↓

從城頂眺望出去是這樣的，看得見源自阿爾卑斯山分流出來的萊茵河（Rhine）↓

換個角度望下，真係一望無際。河流繼續往北流，流多幾流便會到德國 ↓

城頂是這樣子的，D 檯椅排成這個形狀，又真係幾有趣，城頂會用來搞下 Event 好似音樂會咁。不得不提的是城頂有一男一女洗手間，以平時去開呢 D 類效外環境，個洗手間一定好多蚊蟲、好臭。之但係又唔係喎，入到去好驚喜好乾淨無臭味喎 ↓

就是這個大窿透光入地牢 ↓

在城頂影相的她，係咪有多少氣紛先 ↓

但實情係佢混入左當地導賞團 / 旅行團之中，搞笑 ↓

參觀完之後便經樓梯行返去市中心，兩旁種滿葡萄樹 ↓

這便是 Schaffhausen 的大教堂，曾經係之前既相片出現過，認唔認得先？這裡少了幾分奢華多了幾分僕素，大門刻有四福音作者。都係個句，其實都幾陰森。行行下就搞笑啦，無啦啦有隻大狗係度吠，嚇到朋友仔突登兜去行一條陰森 D 既路。不過陰森還陰森，都有唔少人 Hea 係度吃 Lunch、吹水。至估唔到的是原來這裡都有舉辦音樂會。 ↓

如是者就行返去 Coop City 吃 Lunch，其實今次唔係第一次去 Coop City 既 Food Court，係 Lucerne 個日其實都見過，不過因為唔識叫所以放棄了。今日再見返，當然就要剋服佢，學識點叫啦，話晒都平！咁就叫左以下呢 D ↓

叫既過程都唔太順利，由於個陣係 Lunch Hour，所以都要排隊等揀飯。但問題就來了，無圖無 Sample，字就寫德文。諗住都唔緊要既，咪用手指指指指指指指指，點知指佢又唔明，我又唔明點解佢唔明。擾攘一小陣，後面有位疑似識英文同德文既男士幫幫忙，但其實都唔知幫左乜野，如是者結果就來了「Pasta Barilla」（相片下方）及「Pilzschnitte」（相片上方）。Pasta Barilla 都知係 Pasta，有 D 香草、茄汁煮埋。Pilzschnitte 類似係飯，有個鬆餅裝住 D 磨菇忌廉汁咁。再一人一支 50cl Limonade。大家估下幾錢？飲品 CHF 2.5、每款主菜約 CHF 10，總共 CHF 27.4，即 HKD 250，哈哈。係咪好貴呢？但相對當地打工仔薪金已經都唔算貴了。好食就唔算架喇，但唔係難食既。不過我見到有 D 本地人叫扒吃、又有炸魚，好似吸引 D 咁。吃飽後又回到夫隆瓦格廣場，呢個時候都好多人坐晒係露天位了，與今朝早既情況大為不同 ↓

到車站坐 S-Bahn 到Schloss Laufen am Rheinfall。S-Bahn 即是區內短程鐵路，車款都唔同 ↓

呢個真係名副其實「火車捐山窿」↓

好地地黎呢度做乜呢？睇下地圖估唔估到。無錯啦，就係黎「睇水」，睇 Rhine Falls。現在位置是紅點下面黑色有個弧形山窿，而我地就要邊行邊睇，過埋橋咁 ↓

去到其實可以比 CHF 1 入去展望台參觀，這便是售票處以及入內「大門」↓

入闡前一刻，其實所謂既展望台係由瀑布旁的 Schloss Laufen（勞芬城堡）延伸出來，看得見城牆嗎 ↓

對面岸是這樣是的，有間餐廳。看來都好平靜，睇不出是瀑布下游吧 ↓

瀑布上游，都有多少激激地 ↓

來了，準備好了，這便是 Rhine Falls。這是歐洲最大的瀑布，氣勢磅礡，有如萬馬奔騰。瀑布中間有個小島，雖則似大 D 既石頭，有船可以登陸小石以最接近瀑布既位置感受壯闊既波瀾 ↓

另一個角度望埋去 ↓

其實個展望台都唔 Hea 的，上中下三路都有展望台，最低個展望台真係好近距離就觀賞到瀑布。雖然伸手未可及，但應該都係兩三呎到遠唧。有個人仔行到好埋咁影 ↓

本身都想坐艇過對面再坐艇到島上，之但係 ... 去到既時候，船係有啊，但唔知邊到有船票賣，本身有個售票處，不過無開。依家諗諗下，唔通係係架艇上面買。其實買到既話都應該會去坐，可惜買唔到 ↓

由於先前想買船飛，所以離開左展望台範圍，剛巧裡面有部 Lift 可以升返上去「高地」，咁就試下用張參觀券再入闡，又得喎。正當我好歡欣咁入左閘以為唔洗行之後，點知隔離朋友仔用張券開左個閘之後竟然用隻手「轉」個支旋棍。絕對無言啦，開到口話「做乜事」？做乜開閘唔入閘。不過都無辦法了，我行返出閘一齊行上去。言歸正傳，正正因為買唔到船票，激發起我倆行橋過對面既決心。果然橋上景色與之前完全唔同，從對面岸看又有另一個景色。可以見到剛才的展望台和兩舊大石，石上真的有遊客啊 ↓

雖然呢度係瀑布，但河水都依然好清，就咁睇唔係好深啊，但一跌落去就死梗 ↓

其實行到半路就發覺唔係好對路，路程比我地原先想像既遠好多，所以都行返轉頭走人。話分兩頭，必經個條橋，中間係火車路軌，兩旁就行人路咁，當火車高速經過個陣都真係腎上腺素急升，好震憾！！此外，當我地係橋到自拍緊既時候，有位當地伯伯好主動幫我地影相，雖然影到 Out-Focus，但都好多謝佢。佢問我地來自邊到，話黎自香港，佢停左一停，再問係咪好遠，真係好遠，要撘十幾個鐘飛機。哈，個位老人家好明顯唔知係邊度。都係既，香港都只係個彈丸之地，咪以為咁出名。其實 Rhine Falls 規模不大，落差只有 23m，不過幅度就有 150m，每秒水量相當驚人，特別是在夏季日子。這瀑布於冰河時期已經形成，即一萬四千至一萬七千年前。Schaff 是指船，而 Hausen 即是家的意思。Schaffhausen 會成為交貿繁榮的上落貨區便是因為這瀑布。

睇完瀑布就返返去遊客中心抖下，有野食、有野買，還有洗手間去。今次呢個洗手間尚算乾淨，但就無之前咁驚喜。相中黑色個舊就係煙民用來打邊爐的用具 ↓

如是者撘返 S-Bahn 返去 Schaffhausen，回到廣場花了 CHF 3 買了杯軟雪糕。在廣場找個位子嘆雪糕，就像當地人一樣曬住太陽唔知做乜咁樣坐係度 ↓

吃完逛多一小陣就回去 Zurich 了，再次經過相同的地方，但依家已經好好陽光，無左層霧，都真係幾靚，不過其實用來拍電影都可以好陰森 ↓

回到 Zurich Bahnhof，見到有 Carnival。其實早一兩日都見有工人 Set 緊場，估唔到咁快就搞掂。除左幾匹馬之外，內裡樣樣都有 D 啦，我見到有旋轉木馬、有小食檔，當然少不了既就一定係啤酒檔啦。整個 Carnival 都係車站內，都咪話唔神奇 ↓

玩左成日，回酒店 Refresh 下，頭兩晚入住的是 Hotel Bristol，三★。每晚房租大約港幣兩千，絕對唔係平，不過歐洲大城市係咁架喇。不得不提係呢間酒店地點真係一流，超近火車站，用四個字形容一定係「靜中帶旺」。酒店房內都好整潔，用色較柔和，感覺好舒適，又或者是因為木地板既關係，真係特登為左木地板而 Book 呢間酒店。有個露台仔，可以出去飲兩杯，之但係除左出去影相之外，都無停留過。樣樣都好骨子，有三十幾吋既 Samsung 電視，不過印象中好似無開過。略嫌被單既款式就老土 D 咁啦。同埋可能是三星既關係，房內無雪櫃之餘都無乜杯，結果係要用到之前買雪糕吃剩底既膠杯。原來無拖鞋都真係幾唔方便 ↓

見唔見到右下角個包竹蔗茅根，有人放左落背囊帶上機而過海關又無比人查出來個下先奇。呢盒野係大家都唔記得，不過就放左係背囊兩日，搞笑。酒店附近的建築物同酒店本身好似 ↓

商量過一陣，決定夜晚到舊市區吃晚飯。行了一轉又一轉，最決找到一間食肆有英文餐牌得來又好似幾岩食，如是者就入去了，間食肆叫「Spaghetti Factory」。叫了兩個唔記得乜名既意粉，都好味既，不過可能落得 Garlic 多，吃完有多少口乾乾咁 ↓

呢間食肆既價錢都大眾化，不過看印象中都差唔多 CHF 4x 定 5x 埋單。當地人超鍾意飲兩杯，但我唔飲就唯有叫一枝可樂兩份分。無計啦，無免費水，有我唔會叫可樂飲。都唔緊要，有得 Cheers。另外會提供一舊芝士比客人自己磨，都幾有趣啊 ↓

同埋真正見識到當地餐廳點樣「埋單」。係香港會有個收銀部中央處理錢同單，之但係係瑞士係每個侍應有個銀包跟身，個位侍應會直接係個銀包找錢，開了眼界！間食肆都一樣有室外既位，都一樣好受當地人歡迎。門面是這樣 ↓

吃完之後到 Limmat （利馬特河）散下步、吹下風、影下相咁，都真係幾靚喎。左上方個幅相見到有隻艇，可以付費上船兜一轉，會經過右上方既 Rudolf Brun Bridge 既底。個隻艇好扁身，唔係都唔夠過條橋 ↓

可能是閒日夜晚既關係，街上都比較靜 ↓

最後係街上比我地見到商店比人打爆左塊玻璃。就算治安幾好都無用，一飲醉左就乜事都會發生 ↓

如是者到附近既 Coop 行多陣就返酒店了，今日都算好充實啊！

That’s All.

五週年‧瑞士遊 Day 1 - Lucerne 琉森

Tue, 27 Sep 2011 19:46:20 +0800

去到當地五點零六點，夠鐘派早餐，今次呢個早餐就幾岩我胃口了，岩我吃 ↓

落機前所謂既小小 Souvenir，有個貪心仔拎多左塊 ↓

唔好睇小呢 D 朱古力，日後無時間吃飯肚空空頭暈暈就發揮極大幫助！如是者個三塊朱古力就收埋係個袋到備用。係咪講到好似 Man Vs. Wild 咁呢？

話咁快就到 Zurich，落機拎行李都順利。由於買了 Swiss Pass，要去車站 Counter Validate 張 Pass。其實所謂既 Pass 唔係大家所想有張卡咁，只是一張好普通加了鐳射標籤既「公司紙」，上面用 Laser Print 印左 D 資料咁唧。而講到好似好勁既 Validate 當然唔會係好似用 Chips 既卡咁用電腦 Validate，只係票務職員打個日期印、再用手抄低個 Passport Number。成件事諗住都會好 Hi-tech，之但係實情又出奇地 Low-tech。這就是 Swiss Pass ↓

都唔緊要，最後個位職員就話左比我地聽去 Zurich 既最近一班車在哪個月台。之但係落到月台既時候嘈左幾句，點解呢？成件事好小事，就係企係邊度等車唧。其實件事真係好小事，咁又點解嘈呢？原因就是瑞士列車大多分為 First Class 同 Second Class，我地買既 Swiss Pass 只係 Second Class，坐 First Class 就要補錢。咁一向穩健既我當然提出話不如望下邊個位多人企 D，但朋友仔就話依家企緊個位好地地做乜要跟人行呢。最後一人讓一步，移過少少位。一陣風咁快列車就到站，總算上左車。Zurich Airport 到 Zurich 大約 10 分鐘到，都好近。講多少少的便是瑞士有個軍營正正就係 Zurich Bahnhof （即車站）隔離，萬一有乜緊急事就可以用鐵路網絡將軍隊運到不同地方。所以幾時都話香港政府用 500 億起高鐵為的是政治考慮多於實際商業價值。來看看車廂內部 ↓

這款車已經算超新，坐位附近都會有電源插頭。機乎每兩卡列車都會有洗手間、新式列車會是用上飛機用的真空式，舊款式便是得個窿直接排便落路軌。行李可放在每兩卡列車設有的行李位或單車位，不放心的可放在椅背之間的空位或椅下。瑞士人很喜歡狗，列車與及大多餐廳都容許客人攜帶狗隻入內。車門是採用半自動式，要按掣開門，每款車廂都不同，唯有執生。好眼的能夠看見車門有單車 Logo，指那卡有位放單車或行李 ↓

以下便是 InterCity 或 InterRegio 用到車頭，月台採用開放式。無「入闡」這個概念，車票是給在車廂內的車長查票用。有 Swiss Pass 當然唔需要點樣理，坐岩車坐岩車廂便可 ↓

講左咁耐都重未離開車站，再來看看車站環境。有一個超大顯示板寫出列車目的地、開車時間等。呢張係之後補影，所以時間有出入。此時大約是早上八點零鐘到 ↓

除左這塊大板，其實還有塊黃色小板，這塊小板寫晒列車開車時間，很準確！下圖是來自另一個車站 Chur ↓

整理一下思緒，話咁快就找到路去將會入住兩晚的酒店 Hotel Bristol Zurich，5 分鐘路程到，當然是要行岩路，我們第一次行既路有兜到，所以花多左時間。由於太早所以未有得 Check-In 住，放低行李就準備展開瑞士遊！好興奮咁行返去車站，見到有車去首站 - Lucerne 琉森。點知原來架車就開，咁唯有跑，但有時追車得來可能上錯車，再加上之前所說既 First / Second Class，要望住黎跑，搞到我唔係跑得好貼架車。當停步想按車門既時架車就開左了，如是者又同朋友仔嘈幾句。真係乜計都無晒，唯有等多三十分鐘撘下架車，等既期間都發現好多煙民。話咁快就有車，由 Zurich 撘一個鐘頭就會到達 Lucerne，本身諗住去睇 Rhinefall 萊茵河大瀑布先，但朋友仔話想去睇下逢週二、六才有的市集，所以之前都改一改行程。去到 Lucerne 無耐就覺得急急地想小解 ... 之但係係瑞士好多 24 小時都入到既洗手間，例如車站廁所、街邊公廁等都要收錢，收費各地不同，大約係收 0.5 - 2CHF (Swiss Franc 簡稱)。收得貴 D 既洗手間有得沖涼，例如各大車站都見到的 McClean。言歸正傳，習慣唔洗比錢就可以去洗手間既人當然唔會比錢。行多兩步見巴士站附近有個洗手間，咁都去睇睇，一睇之下，中伏 ... 原來只係一排尿槽，還有勁多蚊、烏蠅。不過都無計，快快手去完就算。點知行多幾步比我見到 ... 疑似係唔洗錢，我見 D 人都係就咁就入去 ↓

再次言歸正傳，車站對出有個牌坊，都幾特別，雖然唔知乜黎。看看鐘，個陣係朝早九點七。即係香港時間下晝三點七 ↓

上面既公仔好似想拎 D 唔知乜野，有意思有意思，對住整個 Lucerne 伸手 ↓

Lucerne Bahnhof 對出便是碼頭，環境真係幾靚，水天一色 ↓

眼利的話應該會見到湖上有 D 動物，無錯，佢地就係天鵝 ↓

係瑞士都周不時見到天鵝，佢地係好大隻！之但都係湖邊都好臭 ... 以下就係天鵝既獵食過程。真係幾有趣，好少親眼可以睇見 ↓

看看路牌，找找位置。可惜 ... 寫德文，但都唔緊要，照行 ↓

話咁快就去到朋友仔好想去既市集，主要都係賣下蔬果、芝士、麵包等食品，規模唔算話好大但有好多檔咁。由朝早擺到中午，之後就會收檔。同樣位置就會變左餐廳擺檯既地方 ↓

不過整條街最有趣的是 ↓

幾盞鬼啊！有隻狗「捐」左入地下。哈哈。其實呢間鋪門口放了另一隻狗擺設，真係幾可亂真。第一次行個陣見到係度，但第二次行個陣就唔見左了。究竟呢隻狗係真係假呢？如是者就行去著名地標「Kapellbrücke」，即是 Chapel Bridge ↓

另一個角度望埋去 ↓

著名木造行人橋之一，是歐洲最長的木橋。除了連接南北兩岸外，具有防衛作用，建於 14 世紀初。橋上有三角形繪畫，是關於琉森的歷史，聽聞是有關 St. Leger 的生與死。93 年因撞船而燒毀了大部份繪畫，現在橋上還看到有些地方是被燻黑，之後個年修復了。橋上是這樣子的，很獨特的三角構造。仔細看看應該睇到 ↓

之但係 ... 簷外是掛滿蜘蛛網，多到係想像以外，而簷外又真係好多蚊孑！！所以都唔係想像中咁浪漫。咁當然啦，相信只要小部份人好似我咁先會介意。再睇返條橋，橋中間有個八角形水塔，曾經是監獄、拷問所、瞭望台及金庫，來自 Wiki，哈哈。行下行下已經到晏晝，原先市集個位已經有 Café 開鋪，放晒檯椅、太陽傘 ↓

由岸上看橋，加上幾隻天鵝，都真係幾有氣紛 ↓

如是者，就出發前往 Hofkiche（郝夫教堂）。期間經過的都是這類建築物，This is Europe ↓

話咁快就行到去 Hofkiche，正確來說應該是 Church of St. Leodegar。以守護此城市之聖人為名，位於 The Reuss（羅斯河）北岸。735 年興建，多番修建直到 17 世紀中變成現在的模樣，為後期文藝復興樣式。簡單來說，很高很尖、「柱」、以圓和方為主、對稱。這教堂最突出的便是兩座尖塔 ↓

由教堂正門位置向後望，這便是行經的路段，很好陽光 ↓

當地人非常享受陽光，一定要坐 Outdoor、面向太陽、戴住太陽眼鏡睇書、飲咖啡、吹水等。這個旅程真係見唔少，我地稱之為「太陽花」↓

教堂正門 ↓

教堂外相關雕塑，知道第二行中間的天使是誰嗎？是天使長米迦勒（應該是）↓

教堂內部，由於當天是閒日早上，遊人都比較少，難得影到一張全景。很莊嚴 ↓

教堂內部其他剪影，至有趣的是兒童玩樂閣竟在聖壇的旁邊。此教堂之管風琴號稱擁有瑞士最美音色，可惜無機會聽到 ↓

離閒教堂，前往琉森著名景點 Löwendenkmal（獅子紀念碑）。沿途見到有個位幾有趣，兩個鬍鬚佬好辛苦咁頂住座建築物 ↓

邊行邊撞邊搵就到 Löwendenkmal。這座紀念碑整個氣紛令人很感動，是記念 1972 年法國革命中，在巴黎保衛著 King Louis XVI 與及王妃而陣亡或屠殺的瑞士傭兵。獅子被箭射穿心臟、倒在刻有代表法國王室的百合花飾的盾上、旁邊有代表瑞士之十字盾。獅子上方刻有Helvetiorum Fidei ac Virtuti，即「To the loyalty and bravery of the Swiss」，而下方則刻有軍官名稱、陣亡人數 760人及生存人數 350人，與及事件發生日子。紀念碑配合池水、林木、陽光，總括來說，淒美 ↓

在紀念碑旁有 Gletscher-garten（冰河公園），之但係感覺上同實際上都無乜野睇，再加上入場費都唔平，港幣要百幾銀，所以就唔入去參觀了。輾轉就往 Museggmauer（慕西格城牆），搵呢度城牆就辛苦了！雖然知道個方向，但實際點樣行唔清楚。加上未食野真係有 D 頹。之前提及過飛機餐個 D 朱古力呢個時候就發揮作用啦，一人一塊，頂住檔先。行下行下竟然行到學校、民居附近，點睇都唔似會去到，之但係最後又比我地搵到路去喎，搞笑。這度牆曾經是環繞整個 Lucerne 舊市區，為 1386 年之建築 ↓

城牆上眺望 Vierwaldstättersee（四森林州湖），又名 Lake Lucerne↓

琉森市區方向，相片中間左方便是車站位置、中間尖頂便是之前提及 Kapellbrücke旁邊之水塔 ↓

城牆的另一邊是學校，靚到呢 ... ↓

大家都知城牆係凹凹凸凸，行到去凹既位，D 風吹埋黎真係大風到呢，唔係有額外既欄都好易跌落去。行到咁上下就到瞭望塔，都唔知邊個打邊個，本是有分的。內裡是都幾靠陽光照射，人影都無隻 ... 都咪話唔驚仔。可以好清楚由木條之間看到幾層樓下既地面，信晒佢 ↓

上完瞭望塔再落返黎離開城牆，可以看到城牆另一面。還有一個草坡，有人放羊放牛。見到草泥馬正身，難得啊！ ↓

準備行返去舊市區搵野食，睇下 D 河水真係清到見底 ↓

途經另一古橋 Spreuerbrücke，即 Mill Bridge，結構上與 Kapellbrücke 很相似 ↓

看上去很浪漫吧？實情豈不是啦，真係他媽的多蚊孑 ... 係多到用一群群黎形容。見唔到就好地地，但陽光照射下睇得好清楚，真係大開眼界 ... 唯有唔講野低頭向前行。臨上橋之前看到有一群人係度吃 Lunch，又好似好寫意嗎？都係個句，好多蚊孑 ↓

從橋上往前（東）看 ↓

回頭（西）看，湖水都是這麼清 ↓

再行多幾步向前（東）看 ↓

再行多幾步又會見返 Kapellbrücke，從哪個角度看都好靚。有個鐘樓個位置便是 Town Hall ↓

沿途有部份建築物都繪上壁畫，對非本地人來說幾吸引 ↓

Town Hall 的背面，鐘樓比市政廳早 100 年完成，鐘樓約 1505 年興建，具防衛作用。1619 年增建四隻 Bay-Windows，即尖頂旁凸出的四隻窗。市政廳約 1602-1606 年興建，具有文藝復興建築特色。掛著的藍白旗是琉森州州徽 ↓

行左咁耐，終究有 D 肚餓。瑞士比香港慢 6 小時，當地時間已經一點零，又係非常傷腦筋的找地方吃飯。第一餐未感覺特別難，因為未體會當中難處。本身睇中一間吃 Pizza、Spaghetti 的餐廳，但之後行下行下就去左呢間 Fondue House，最主要係比佢既 Lunch Special 吸引著 ↓

餐廳佈置得幾有氣紛，看一看餐牌無心水，因為寫德文睇唔明。問了侍應 Lunch Special 是甚麼？原來就係最普通個隻 Cheese Fondue，盛惠 27 CHF，1 CHF= 9 HKD，即係兩個人叫兩個 Lunch Special 就已經 486 HKD。都唔緊要既，話晒都叫第一餐，吃好少少，本身都預左每人 Lunch 用 20 CHF、Dinner 就每人 50 CHF。言歸正傳，都略聞最傳統既 Cheese Fondue 是除了麵包甚麼也沒有，今次真係聞名不如見面，真係除了麵包甚麼也沒有，不過都好少少，有好多舊薯仔。D 麵包真係堅硬同乾，同係香港吃開個 D 完全唔同。個芝士鍋好足料，白酒都好足，絕對比我上次自己整既芝士火鍋重酒味。吃到一半已經頂唔順 D 酒味，最後係剩吃薯仔 ... 麵包吃剩多少咁，但睇返其他個幾檯客都無一檯吃晒 D 麵包。試過一次就夠了！

吃完都無話坐多陣就走，去左車站旁的 Kunstmuseum Luzern（琉森美術館），很 Stylish 吧？↓

令我 O 咀的是美術館對開的空地位置準備做 Carnival，放左摩天輪和跳樓機 ↓

由於 Swiss Pass 包含 Museum Pass，所以大部份 Museum 都可以免費入內參觀。放低個背囊入 Locker 後就展開有藝術氣息既行程。今期美術館有特別展覽，是關於後現代山水。想知有關詳情請到 Google Search「Shanshui: Poetry Without Sound?」，有幾件作品都令我開眼界。有少少題外話，話說有一團導賞團，主要都係老人家。其中一個疑似係是次展覽既 In-Charge 見到我地兩個亞洲人樣就主動走過來打招呼，起初說德文、之後用普通話，但我倆 D普通話真係水皮，所以都係用英文對話。個位外國人對中國係有 D 認識喎，知道香港唔係用普通話，係用廣東話。傾左幾句之後導賞團中有位老伯伯走埋黎問我地係咪來自 China，當我地答 Hong Kong 既時候，老伯伯就話 Hong Kong is part of China，係有 D 認識喎。如是者四圍再逛左陣，又再遇上導賞團，另一位老伯伯走埋來用普通話問個展覽怎樣。再重申普通話水皮既我用有限既普通話個展覽都唔錯啊，老伯伯說了句「是嗎？」，之後拍左我膊頭一下就走了。整個互動很短但很深印象！看到這裡，發唔發覺所有交流都主要圍繞著我，那麼我朋友仔呢？是不是行開左？絕對不是，而係每當有人問佢野既時候就會停頓數秒無反應 ... 我都唔知點比反應。

另一件小插曲承接瑞士好多洗手間都是收費，好難搵到個乾淨但免費既洗手間，至少當時未識係邊到搵到。所以難得去到美術館，咁就一定會有洗手間。一入去真係「嘩」一聲！完全比佢既清潔程度嚇一跳，好有驚喜，係超乾淨啊！不論去大定去細，都一定去得好暢快同安心。

睇完展覽，到了瞭望台，看到車站和地面的摩天輪 ↓

美術館的另一面和附件的學校，都係好 Stylish ↓

見還有 D 時間，咁就行返去橋附近的 Jesuitenkirche（耶穌教會）。由 1666 年興建，1677 年完成，是最早期完成之巴洛克式建築。巴洛克式建築與耶穌會有極大關係，詳情自己 Wiki 下 ↓

教堂正門上的是 Saint Francis Xavier，此教堂之守護者。「華麗」是巴洛克式建築的最大特色，但有趣的是內裡是洛可可式，崇尚柔和的淺色和粉色調。兩者分別又可以自己 Wiki 下 ↓

教堂隨影，天花的繪畫為 Glory of Saint Francis Xavier↓

行完教堂時間話遲唔遲，話早唔早，下晝四點到。按原定 Schedule 是係琉森吃埋晚飯先回蘇黎世，但個 Cheese Fondue 真係好頂胃，吃唔落。如是者決定返去蘇黎世個邊先，去到蘇黎世行左陣 Coop，即係當地超市。買左少少野就返去酒店，酒店房是這樣。見到有把風扇就知到無冷氣啦，朋友仔對於得把風扇有多少錯愕 ↓

但錯愕都無用，兩個都攰到嘔，攰到無力。平時每次入住酒店之前都會影晒相，今次真係唔得，Hea 影左一兩張就沖涼睏。睏之前食左杯雪糕同乳酪，原先諗住無冷氣都有雪櫃掛，點知無雪櫃，唯有食晒佢。還有特價的拿破侖蛋糕 ↓

經過討論後，決定直落唔食晚飯睏到另一朝 ... 入睡時間約當地時間六點幾七點，即係香港時間凌晨一點幾 ...

That’s All.

五週年‧瑞士遊 Day 0.5

Mon, 26 Sep 2011 22:32:15 +0800

今次瑞士遊記嘗試加入各大旅行團所用到推銷字眼，看看有無新既體會。言歸正傳，行李都係去之前既幾個鐘先動身執，都咪話唔遲。由於要坐十三個鐘先去到，臨走前都沖個涼剃個鬚。如是者趕頭趕命終於趕上「約定」之 A10。其實我真係唔太鍾意 A10，一 Miss 左就要等 30 分鐘，好困身。一上到車就見到渠仔，如是者放好行李就坐埋去。點知坐左無耐，司機就叫「哥仔，嘟左卡未啊？」OMG，原來我未拍卡嗎？真係好瘀皮，明明八達通已經拎左上手，咁都無拍卡？唔係嘛。如是者開壞左個頭，再一次激發起我對 A10 既討厭直到機場。A10 其中一個討厭就係司機唔會點等乘客放好行李便急急開車！

去到機場找間食肆坐低吃多少野，揀左翡翠小籠包。明明就吃過，但有人就話無，真係極無奈。去到坐低都坐得逼逼狹狹，特登既，等人吃完就快 D 走。無問題，我都打算吃完快 D 走。有另一位本來相約係機場見面既人仔甩底，渠仔 OK 失望，人就是這樣，無計。如是者入闡等上機。我倆乘坐瑞士航空公司豪華客機直航飛往瑞士金融中心～蘇黎世夜機，到步是當地朝早。起飛無耐其實都有多少眼睏，不過等派餐，無計仔啦，這就是兩款飛機餐 ↓

有意粉和雞，另外有條芝士。其實夜媽媽又眼睏，吃乜都差唔多。食多少之後睇下個 Entertainment System，看看你能估到以下歌仔嗎 ↓

之後關燈睏覺，不過睏得 OK 差。原因是坐近廁所位，一來有人行來行去，行都唔緊要，至慘得閒有 D 光照出來，唉 ... 最 Jealous 就係隔離個位睏得好喎！！神奇也！睏唔到都要閉上眼，如果唔係第日仲邊有精神呢。

去這次旅行雖則興奮、期待，但始終第一次接觸少不免都有幾分緊張、擔心。話就話結伴而行，之但係我感受唔到當中既 Support。

That’s All.

五週年‧瑞士遊 Day 0

Sun, 25 Sep 2011 19:38:26 +0800

話咁快就已經五週年，踏入第六個年頭。今年與往年有多少分別是朋友仔做到九月就轉公司，轉公司之前有一段話長唔長，話短唔短既假期，都應該係繼暑假後最長既一個假期。如是者便找緊這個檔期，想話去個旅行。開頭都有幾個方案，話不如去日本玩下，之但係日本都去過、台灣都是這樣。之後就話不如分開去兩轉啦，不過咁又未善用到假期的長度。講下講下就不如話去歐洲，如是者，安全的瑞士便是我們的首選。原本想話去 12 日，因為唔想走咁多堂，這樣只走了 2 堂。但其後因某科既 Workload 太多既關係，而且 Present / Assignment Deadline 正正限死個假期。儘管幾有興趣都好，都 Drop 左佢。Drop 剩既另一科其實「無乜料到」，走兩堂都無問題，如是者就擴大到個日數到 17 日。

個假期就計劃左好耐，但個旅行就唔係計劃好耐，本身都有諗過跟團，但話晒瑞士咁安全自遊行應該都 OK 掛。到最後都係自遊行，出發前兩個零禮拜先買機票、訂酒店。行程個 D 到出發前幾日先定下來，都係趕趕趕。出發前一日落左銅鑼灣買 D 旅行用補給品，糖、餅、沖劑等，都買左一大袋。買完之後就去好耐都無去過既 Pokka Café 吃晚飯。有一期好鍾意吃佢，可能佢靜得黎又幾熱鬧，食到有 VIP 卡。不過自從一週年左右就無再吃，原因好簡單，朋友仔覺得佢以咁既價錢麻麻地好食。今餐就叫了兩個 Set Dinner，一份牛、一份雞 ↓

個帶子焗薯蓉出乎以料地好食。之但係食到半路感受到一股氣，有個裸女望住 ↓

又會咁搞笑既，無啦啦有個咁既擺設。最後餐飲是我愛飲的凍檸茶和佢愛飲的凍奶茶 ↓

簡簡單單吹下水咁就過左一日，旅行要預備既野都準備得差唔多了，只欠行李未執過，哈哈。

That’s All.

小休一下

Sat, 24 Sep 2011 23:43:41 +0800

有時晏晝自己一個人係 Office吃 Lunch 既時候都會買個外賣返去坐定定自己一個靜靜地咁食。環境很寧靜、自然光加上合宜的室溫，個種感覺真係非筆墨所能形容。面向窗門時，加少少幻想就彷彿身在沙灘望著大海一樣、聽著像浪濤聲的冷氣機聲，只能以「爽」來形容。這種感覺在舊 Office 是沒有的，在過渡期的 Office 都沒有。也許是因為新 Office 多了很多窗而且少了窗簾，陽光能直接照射入來，感覺真係幾 Warm。很高興公司接納我這位小員工對 Office 傢私擺位的意見，或許有人對現在的擺位覺得不合心意，但已盡力。同樣地，另一邊 Office 都一樣。

話做唔做，話唔做又繼續做，係呢個 Office 都做左年幾有多。要離開現在的 Office 真係有多少可惜，一來 Office 位置很方便，二來放了很多心機落去，最重要的是洗手間很乾淨，去得很放心。另一個 Office 地點頗辟偏、總是暗暗地、去個洗手間都總覺得污污糟糟。有這樣的感覺也可能是現在的 Office 實在太好，好到無得彈。不過點都好，轉 Office 之後再看看如何。轉 Office 背後是因為轉崗位，新崗位很陌生，雖知道新工作的大方向，但細緻要點做是一頭霧水，可以用「X」來代表種種憂慮與未知之數。值得高興的是有位好老細，無佢都無大假放。雖然我工作年資雖少，識既「老細」有限，之但係一個老細好唔好都分到既。遇到好老細，都係有今生無來世。

之前都有人提點過盡量唔好說工作的事宜，這樣做對份工來說很危險，始終人言可畏。對，說得對。但又應該點做呢？竟然有點攰，奇。要小休一下。

That’s All.

有緣千里能相聚 + 讀得高興

Fri, 23 Sep 2011 22:52:23 +0800

有緣千里能相聚
有時 D 野就係咁，有緣的話去旅行係外國機場都會遇到；會無啦啦一個係車、一個係街四目交投；會落車無啦啦見到對方排緊隊；就算會等過馬路都見到面。之但係「有緣」呢 D 野都可以安排既，難得地竟然返學日子約到幾位培德妹妹吃 Lunch ↓

睇見佢地行落黎食完再行返上去又要趕就辛苦。之但係有人好 Yeah 話遲到咪遲到，記遲到，無乜點。這就是霸氣！

讀得高興
早幾日同朋友仔講起讀乜野科開心讀乜野科悶，綜合返原來我上得高興個幾科原來都係無 Group Presentation 同埋唔係某某教。都係既，個 D 所謂 Presentation 其實都係一劈頭分左邊個負責邊 Part，之後都各自各，都無鬼謂咁。或者我咁多年都未真正感受到 Group Presentation 既好處。今個 Sem 個科都有 Group Presentation 同埋係某某教，所以今個 Sem 呢科都應該上得唔會太高興。唯有期待下個學期。

That’s All.

單字一個：「食」。

Fri, 16 Sep 2011 23:02:01 +0800

1. 話說由八月尾到九月頭都 Keep 住密密食，都係好友相聚、良朋共宴。先來就係打邊爐，同幾位？？義工導師打邊爐。一睇就知邊隻係我用既碗碟啦！

幾個人分頭買，本身想試下豆乳鍋，但又買唔到個隻湯包。唔係話唔可以整個湯底既，不過貴同煩。如是者就改做普通豬骨湯底，都 OK 仔。之但係買丸買左差唔多兩百蚊，都咪話唔誇張。一大塊未解凍既牛肉，就咁睇返都有多少嘔心。如果吃前解解凍，會好好多，依家好似晒左 D 牛肉。話分兩頭，一落牛個煲就超油膩。

食就當然食唔晒，按慣常做法既就會每人分 D 食物拎走，之但係我地決定搵過另一日晏晝再打多次邊爐。都真係咪話唔誇張！Lunch 都打邊爐，都幾新鮮啊！

2. 香港仔有三間酒樓是來自同一個集團，而某天崇拜完就拎齊晒三間酒樓的籌 ↓

其實我都鍾意係酒樓飲杯茶嘆個美點，係坐得舒服少少既酒樓更 Good。中秋節奕日就去 Time Square 飲個茶，有這個箭豬造型奶皇包。個造型係幾得意，之但係個 D 箭真係會吉親咀，要小心小心 ↓

另外原來兩個人飲茶吃幾款點心之後係食唔落炒粉麵飯，下次真係要記住！

3. 話說有人話想燒野食，咁你堆我讓之下終於有人做搞手。由吹水到成事都只係一個禮拜多少少，真快手。如是者又分批買肉、丸、碳、雜項和霸爐。看啊，多歡樂的丸 ↓

燒到中後期 ... 竟然 ... 看看下圖，睇下睇唔到有甚麼玄機 ↓

有堆扒跌左落地下，OMG ↓

個 BBQ 比想像中 OK 喎。開頭都驚呢堆人同個堆人唔熟會悶場，點知去到就各自各精彩，大家高興無悶場，夫復何求啊！最後，如果加多場 Buffet，就真係 Perfect 池啦。

That’s All.

「Drop 科」與「學琴」

Tue, 06 Sep 2011 19:31:13 +0800

Drop 科
話說呢個 Sem本身 Take 左一科關於 Youth 既 Counselling 科，老老實實，真係有幾分興趣。之但係，上完第一堂知道個 Workload 之後，所有興趣都無晒，哈哈。其實上到去所謂 Taught Master Level，都只係全科合共寫幾千字、做個 Group Present，極其量考埋試都已經好盡。可能我讀雞校所以 D Assignment 既程度雞 D 都唔出奇。先來睇下數據先，呢個 Course開左兩班，一班比 Postgraduate讀，上面個行；另一班比Undergraduate 讀，下面個行。最左邊就係 Course Title，之後順序由左至右既數字為 Course 既上限人數、實際人數、剩餘名額 ↓

原先第一堂 Postgrad 個班有廿幾三十人，依家只係得返九個。Undergrad 個班有 D印象原本都有近二十人，依家得六個，究竟發生乜事呢？講下個 Workload，睇下大家會唔會 Drop 左呢科。先來要找個 3-8 歲既小朋友同佢玩，然後寫一千字 Reflection，關於當中感受同互動。另一份就係 Group Presentation，第三份就要根據所有 Group Presentation 寫一份二千字既 Reflection。最後就係要用某某 Therapy 去寫一份三千字既 Term Paper。總數前後要寫六千字，另外再加個 Presentation。其他科平均都只係寫三千字再加個 Presentation 咁唧，一比之下，我就揀左 Drop 科。本身都唔諗住 Drop，但個 D功課實在太密，阻住我放大假，把心一橫就 Drop 左佢！Undergrad + PGDE + Master 咁多年，係第一次 Drop 科，之前就算讀普通話我都挨得住唔 Drop，但呢科真係 ... 我無足夠智慧去讀。

最新消息是 Undergrad 個班已經 Cancelled，好絕啊！

學琴
話咁快就學完所謂既第一級，踏入第二級。點解咁肯定話係第二級呢？原因好簡單，學費收多左 ... 但唔知係少時間練、決心細左定還是真係難左，總係彈得麻麻地。咁重練既比率突然倍升，試過只係學一首新歌，重練兩首。我倆都各出奇謀以防重練。程度輕既就會「出口術」，呢招原來朋友仔已經好早就出，我呢 D靠實力既開頭都無出口術，但後期真係唔係好得，未彈之前已經同老師講呢首好難喎，打定個底先。程度重 D 既有人直情快快手摺埋本書，唔比老師寫重練日期。真係好絕！我都甘拜下風！遲下又睇下有乜新招。話分兩頭，首「滴答鐘」Already 重練兩次，黎緊睇下洗唔洗再重練多次。

That’s All.

[轉述] 傢俬組裝記

Sun, 04 Sep 2011 08:30:19 +0800

轉述之前，八月換了好幾件傢俱，換了電腦檯、衣櫃、床，為的是一部琴。總算安置晒，係未執完 D 野。為左部琴，換晒咁多傢俬除左決心之外都係需要錢。言歸正傳，話說某某又買左個琴，又因為咁換左個新書櫃。好啦，正當興緻勃勃咁等師傅砌完用新櫃用之前發生件事好掃興。比人哦呢 D 野已經在所難免，正所謂出錢出力換個櫃大家高興唧，點解咁都哦呢？之不過掃興既事並非如此。以下我以第一身轉述事件。

禮拜六下晝，師傅送櫃砌櫃，移好位之後師傅說個地唔平要搵野攝櫃底。咁師傅問有無銀仔攝，我就問用紙得唔得，師傅話用紙會霉，佢話用金屬都得。但無啦啦點會有唔用既金屬。如是者就搵下有無銀仔，搵左幾個一蚊兩蚊去攝，都唔夠，師傅用埋自己 D 銀仔都唔夠攝。於是我就忍痛搵左個十蚊銀去攝，總算搞掂。用十蚊銀去攝都未算掃興。掃興既事其實係自己做成。話說師傅搞掂晒走人，咁我突然醒起應該要鑽牆裝口鏍絲固定個櫃，見師傅係大堂等 Lift 既時候就叫返師傅回來，問師傅係咪要上鏍絲，師傅話上唔上都得。咁我見係咁既時候咪唔好晒，叫師傅上鏍絲。起初都好地地，但師傅鑽鑽下發覺 D 聲怪怪地，開頭都不以為意，點知去牆既另一邊一睇，即刻呆晒 ...

成床都係牆灰 ... 師傅鑽穿左道牆 ... 當師傅入黎一睇就話「唉！死啦。」但佢講完呢句之後，另一位師傅就繼續鑽。我望住道牆 D 灰隨著鑽孔噴出，個刻真係無言而對，好無奈。師傅都無野講 ... 之後佢地就走左。當我睇住個窿同成床灰個陣，真係 ... 非筆墨所能形容。為左渲洩情感，打電話同人講。但到頭來比人話做「鍵盤戰士」，應該係清理現場而唔係影相留念。都岩既，淡淡定成件事就會過去。依家打算買 D 補牆灰去補返道牆，不過個窿話大唔大，話細唔細 ... 至搞笑係 ... 一是我叫師傅回頭來裝、二是再睇返組裝說明是「為防家中小孩攀爬以致書櫃倒下，請以鏍絲將書櫃固定於牆上 ... 」家中邊有小孩 ... 唉 ... 真係好灰！

In Memory Of ...

That’s All.

誰偷走我的時間

Fri, 02 Sep 2011 00:37:08 +0800

睇下睇下上次篇 Entry 已經係六月尾，依家已經係九月頭，呢兩個幾月忙過不停，不斷忙「執」。先來張成果先，真係幾毒 ↓

時間一去不復返！近日覺得 D 時間陰下陰下咁唔見晒，最表現到呢個現象既就係「練琴」。明明之前未買琴個陣都有時間練下，但係依家有琴反而好似練得無咁好。究竟點解會咁呢？我想到當中原因，就係攰！無啦啦又點解會攰呢？原因就係「執」。返工執野，回到家就無心機執；返工唔洗執野，回到家就執野，基本上每日都總會執下野。遺憾的是執野很累人，累人就自然想 Hea 下，結果就無乜大作為。唔好話練琴，就算 Game 都玩少左。之前高峰時期平均兩個禮拜玩近 40 小時，近期試過最低十幾小時，依家就二十小時。之但係執野還繼續。

再回帶返前 D 有暑期活動個陣就唔洗返學既，之但係有時活動完左都散晒。明明都唔係自己帶，但又莫名其妙的疲倦。活動整體上都唔錯，玩得都高興。唔可以話同 D 義工導師好熟，之但係又的確係相處耐左熟左 OK 多。又幾唔錯。

再數前 D，要做一份 4000 字既精神病理學既 Essay，寫下寫下，又比我寫到喎。呢科 Result 雖然無 A- 但都叫有 B+，都算幾唔錯啊。Summer Term 上堂個種氣紛真係唔同 D。

最後，有少少感受就係要學會跟別人的步伐走都不容易，走走下好易變左人地跟著自己的步伐走。

That’s All.

食 + 快樂之道

Wed, 15 Jun 2011 10:51:36 +0800

食
日本幅射泄漏問題未解決，之但係善忘的香港人都看似無左件事。我都係善忘既香港人，呢期繼續食食食。話說某日係 Sogo Freshmart 見到呢個牌子既雪糕有做 Promotion，如是者試晒所有味道既雪糕雪葩，最後嚴選八款出來！包括以下既黑糖雲呢拿 ↓

至有趣既地方係個杯底真係有 D 黑糖係度！另外還買左奶茶、白米、鹽、煎茶、三款唔同味既柑桔味雪葩。轉個頭又去盛八吃燒肉，今次試下燒雞翼，唔知係咪真係香港人善忘既關係，價錢已經無幅射泄漏個期咁抵吃 ↓

早幾日渠 G 說話要豪吃，話就話豪，都無乜好吃。好耐無似炸大蝦，如是者一放工就碌出去銅鑼灣排隊 ... 一開鋪就入去吃。真係好好吃 ↓

輾個轉到 Haagen-Daz 吃甜品 ↓

右下角杯野飲其實係來錯左，當我地打算飲左佢既時候就有人出來話來錯。搞笑！出現時間係我吃了塊朱古力後 ... 如果係黑店的話，就會話「你食左啦，無得退架，盛惠 $999。」

最後香港仔翠華裝修後，部份二人檯個位間到好細，係腳頂腳 ... 都 OK 既 ↓

快樂之道
早幾日聽左個講座，是關於 Quality of Life，值得思考一下。是咁的，話說去衡量 Quality of Life 分 Objective 和 Subjective。Objective 就係 Physical Health 個類；Subjective 就以 Subjective Well Being，即係 Mood 或者 Happiness。而 Subjective Well Being 細分有 Short-Term（Stage）和 Long-Term（Trait）。

日常生活會遇到有好多壞事，而當中我地會有個 Buffer 作為緩衝區防止呢 D 事影響我地個 Mood，而Subjective Well Being 就好似體溫咁好 Stable。當這些事衝過 Buffer 既時候，Subjective Well Being 就會減少，便會出現 Depression。Buffer 分為 External 和 Internal，External Buffer 可以係 Intimate relationship（詳細想知點解就去 Wiki 睇下），又或者係 Money。呢個時候就會有人曲解左 Money 既角色。當你好高興去買 D好靚既衫返來著，個一刻會好開心，這只是一個 Stage。Money 作為一個 Defensive Resource 既用途並不在於此。最常見既例子係假設你係在職人士，同時照顧小朋友與工作係有壓力，而小朋友又成日又叫又喊。當個小朋友需要人照顧既時候，而你又唔想影響自己情緒，那麼用錢去請家庭傭工去照顧小朋友，不論如何，這能夠較長期解決那些煩事。一個工人唔夠請夠十個，Money 是這樣的一個角色。

無奈既係大部份人都未必有這麼多的External Buffer。所以我們都係靠 Internal Buffer，即是 Cognitive Restructuring，在認知上下功夫。要活得開心便要強化 Internal Buffer。例如教人唔好怪責自己、怪其他人，哈哈；又或者嘗試尋找事件的其他用意；再或者 Devaluing What Has Been Lost。

講得一舊舊，自己參透下。

That’s All.

五月概覽

Mon, 30 May 2011 18:44:13 +0800

世事就係咁，有 D 關口過唔到就會一蹶不振，就好似寫 Blog 咁。比上一篇 Kic 一 Kic 就成個月無打到。以相片來總結，先來一次中學生聚會整神奇膠珠，最左個隻「豬」便是我的作品 ↓

正所謂「一次生、兩次熟」，再接再厲再整過。今次就真係掂啦 ↓

Extra 有個羊毛氈，超得意，好手勢也 ↓

輾轉翠華開返，又多個聚腳點，正啊喂 ↓

又再返回中學生聚會，玩狼人。當白痴係警長，又或者警長係白痴既時候 ... 多麼的諷刺 ↓

崇拜完既 Lunch，多嬌俏，個個都 Yeah ↓

吃完飯逛下街，兩次機會就中晒最靚既兩個布袋 ↓

一個 Good Morning 真係要有 Good 既早餐，呢個魚柳精選就麻麻地了 ... ↓

難道我係彈琴都有天份？！有個貼紙作證 ↓

其實我都 OK 鍾意去大快活，D 款式岩我。買外賣回 Office 吃驚見 ... 個膠袋同對鞋撞色 ↓

添置了新的 Board Game，叫 Fearsome Floors，都真係幾好玩，好搞笑啊！死係要死得其所 ↓

最後係剛過去既禮拜六，買了吉野家的煙肉芝士牛肉飯。唔好吃 ... 三十幾蚊真係唔抵死，不過禮拜六過左 Lunch Hour 香港仔無乜野好吃 ↓

That’s All.

2011 迪士尼賀生日之旅（下）

Wed, 04 May 2011 18:14:25 +0800

好啦，話咁快又到另一日。其實諗落應該尋日入去迪迪尼玩會有著數 D，話晒都生日，D Staff 會無啦啦同你講 Happy Birthday、卡通人物又會主動同你影相，係平價 VIP 既待遇。不過都無問題，一 Morning 個至緊要就係要 Good，先來個早餐 ↓

食完之後咪咪麼麼咁 Check-Out，見天氣好好地咁就由酒店行去樂園。睇下，胡迪都笑你啊 ↓

行左五至十分鐘，沿途都有音樂播放，期間見到一個定兩個行人同一輛單車，真係人跡罕至。話咁快就到，今年係迪迪尼五週年，有魔術米奇同小仙女 ↓

一去到就去左動畫藝術廊，黎過迪迪尼咁多次都無入過去，今次第一次入去。有迪迪尼撞建後既模型睇，先來玩具王國 ↓

完成品將會有個高過人既胡迪係度 ↓

另一個主題區就係同西部、熊人有關的探險區 ↓

最後一個主題同「迷離」有關，落成後有鬼屋玩 ↓

接下來就有 D 動畫手稿、分鏡圖等，這個是 Tarzan ↓

呢個手辦幾有型。之但係，真人版 Tarzan 點會咁青靚白淨 ↓

美女與野獸模型 ↓

很難想像原本既野獸造型係咁野獸 ↓

還有阿拉丁。嗯，佢好似指住 D 野叫我地睇喎 ↓

原來 ... 佢想我地睇下小魚仙艾莉奧，乜咁既樣，唔通食左鍊造強國食品 ↓

還有 Cars，少有地提唔起興趣睇的 Pixar 動畫 ↓

再來呢個就堅啦，係 Pixar 25 年展都有既展品。旋轉既舞台再上不同頻率既閃燈製造出動畫的效果。今次完全唔洗同人爭位睇，任睇任影 ↓

睇完藝術廊之後去睇精品店，繼續相親相愛 ↓

廣場中既魔術米奇與小仙女，飛躍奇妙 ↓

睡公主城堡都有特別裝飾，當 D 風吹向掛在城堡外的金色閃片，真係好靚 ↓

Hea 左咁耐，去吃個快餐，豬扒包與炸雞餐 ↓

攝個場，當天我們共有六部具有攝影功能的電子產品，真誇張 ↓

吃飽飽都三點幾，無心插柳柳成蔭，又咁岩時間睇到逃遊。呢個係飛天巡遊版，先來唔講都唔記得既小飛象 ↓

好似英女皇出巡既米妮 ↓

肥 Pooh ↓

Chok 樣天鵝與公主 ↓

獅子王既狒狒長老 ↓

史迪仔與大隻 Surfer，真係係架車上面搖來搖去的 ↓

跟住尾既有肥仔胡迪，睇下幾風騷 ↓

另一主角巴斯光年與綠色部隊 ↓

Close-Up，我係巴斯光年，唔係十郎 ↓

還有豬仔 ↓

呢位士兵望左鏡頭好幾次，就 Post 出來分享下 ↓

如是者睇完巡遊再買下野就回程了，本身都諗住玩夜 D 吃埋個晚飯。之但係臨時有野做又不得不早點回家打點。最後，今次迪士尼之遊其中一件最正斗既戰利品，就係呢個米奇公仔 ↓

正啊喂！！

That’s All.

2011 迪士尼賀生日之旅（上）

Tue, 03 May 2011 21:45:17 +0800

話咁快又到一年一度既渠 G 生日，今次與往年我生日相約，都在迪士尼過。咁晏晝約左係 SOGO 買 D 野入去食同飲，揀左 D 杯麵同飲品作早餐。開頭都相安無事，直至見到 $45 15 條既迷你鯛魚燒。我就覺得買黎當餐後、睡前零食都幾好，但係 G 就覺得好快就食 Lunch，買左就食唔到飯。如是者，又嘈左輪，Not Good！背後係價值觀分歧帶來既問題！長遠都一定會再因此而嘈。冰冷期去到迪迪尼 Check-In 完坐定定等開飯先好轉。今次終於有機會嘗試到「晶荷軒」既特色午餐。食飯之前食環境，有荷花水晶燈 ↓

檯椅就是這樣，D 椅背都 OK 高，另外有 D 有扶手，都坐得舒服 ↓

檯上點少得既花，不過唔靚 ... 好在坐四人圓檯，唔係呢個擺設就真係阻定 ↓

登登登登！餐牌都幾靚仔 ↓

迪士尼特色午餐，要三日前訂定，重要係酒店住客先可以訂 ↓

午餐包括「乳豬件拼豬鼻包」、「迪士尼特色點心」、「金像米奇海鮮羹」、「迪士尼小炒」、「梨香鹵肉」、「葡汁蟹蓋焗飯」、「迪士尼雙色凍糕」。先來就係第一道菜，一入一份「乳豬件拼豬鼻包」↓

Close-Up 豬仔包 ↓

可能我肚餓，我覺得 D 乳豬件幾好食。好快就來「迪士尼特色點心」，先來「蠔汁叉燒豬仔包」同「綠色小人菜肉包」↓

再來「米奇煎薄餅」↓

其實只係平時係酒樓一定見到既點心，但係換個造型之後就真係唔同晒，食落都覺得好味 D。個爪啊 ... 係筷子先岩 ↓

中間攝場，G 話咁影好有 Style ↓

再來就係非常足料既「金像米奇海鮮羹」，足料得來重要好好味↓

轉個眼就上「迪士尼小炒」 ↓

比較之下就頹好多了，不過好惹味，有蝦有瓜又有松子。個底紅色個部份其實係蕃茄來的，都幾有趣！之後就係「梨香鹵肉」，有趣係有趣，不過我覺得酸左少少 ↓

最後既就係「葡汁蟹蓋焗飯」，呢個真係好驚喜，竟然有個蟹既器皿 ↓

有個解造型既器皿都夠勁，至勁係隻蟹既 Size 又會剛剛 Fit 晒！呢個焗飯都係好足料，超好味！「迪士尼雙色凍糕」作甜品 ↓

本身都係好普通既紅豆糕綠茶糕，之但係上面加左層 Jelly，食落又唔同左，好味！最後最後，食完都三點幾，都有 D 氣紛 ↓

吃飽飽放低 D 野，窗外有泳池 ↓

一見到有人游水既時候，頓覺應該帶泳衣泳褲！去咁多次都未試過係個度既泳池游水啊！轉個輾就到附近四圍逛，5 週年既新產品 ↓

行到咁上下又夠鐘食晚飯，時間真係過得飛快！由 Disneyland Hotel 過去 Hollywood Hotel 吃 Buffet。呢個都係 5 週年既特別版，僅供觀看 ↓

食物總匯 ↓

呢個價錢其實都算多野食，遺憾的是地點真係偏遠。同埋每次夜晚食完行返出餐廳開個條走廊既感覺真係好 Good！話說我地買左 D 杯麵，想去隔離賣小食既地方拎餐具，之但係原來今晚有個印度餐 Buffet，價錢平少少咁，唔通有印度來既遊客！？由於變左 Buffet，拎餐具既計劃有變，如是者就算數了。食到好飽，想話散下步咁，就試下由 Hollywood Hotel 行返去 Disneyland Hotel。行行下既時候 ... ↓

嗯！點解甩左隻鞋既！？其實呢個問題我都想問。話說行行下既時候，隔離個位無啦啦 Fing 左隻鞋出來，重要向前彈幾步。我第一個反應係「黐線架？」我都唔知點解有咁既反應。完全無預過有人會無啦啦 Fing 到鞋出來。問番原來係對鞋有沙，想整返佢出來，結果就飛左隻鞋出來 ... 搞笑。唔洗一陣間就行到 Disyneyland Hotel ↓

又係精品店行，依家 D 細路仔唔玩釣魚仔，係玩夾鑽石，真誇張 ↓

相親相愛之磁石公仔 ↓

最後最後，作為一天總結。帶左花占餅去吃，正 ↓

精彩活動，明天再續！

That’s All.

剛過去的一週

Sat, 30 Apr 2011 21:08:08 +0800

過去的一週，做了運動。看多麼 Colorful 的我 ↓

隻直升機都玩到有一定既破損 ... 買左都唔夠一個禮拜。看下精選相片 ↓

另一部紅色直升機到步，齊齊叉電！另外買了一定數量既後備零件，好多對翼！之但係，部黃色機既尾翼有破損既情況，只係買左一套更換零件，希望可以再挨多一段時間 ↓

話咁快就學第二堂琴，G 說好困難。之但係我上過又唔係話真係好難既，稍為勤加練習就應該無問題。話雖如此，呢兩首歌仔彈到無名指同尾指抽晒筋，只怪經驗淺 ↓

That’s All.

新しいオモチャ

Sun, 24 Apr 2011 19:49:45 +0800

話說尋日路經反斗城既時候看到有迷你搖控直升機，第一次有 D興趣不過無買。但返到屋企心癢癢去 Search 下，比我搵到段 Youtube Video，睇左 D Demo同 Review 之後。今天放工之後就 ... ↓

哈哈哈哈哈哈哈哈哈，買了。復活節推介，買左 Syma S107，有陀螺儀，聲稱飛得穩定 D ↓

開箱文，配件簡加到無得再簡單 ↓

Close-Up ↓

飛左一陣就己經踫踫撞撞，機翼都有 D 損傷，除左撞到野之外，還有墮機。Finally，有一隻機翼都撞到有一忽崩左 ... 不過都唔緊要，有配件買既。不過最大最大缺點係，Charge 幾十分鐘先可以玩 6-7 分鐘。真係玩到到喉唔到肺 ↓

回到家，Search 下邊到有直升機零件買，Search 啊 Search。最後都係上淘寶睇，又真係有配件賣喎！望多幾眼，有正貨直升機賣？！重要唔洗 $100，真係 ... 激死！之但係，唔係買過來玩都唔知咁好玩既！早買係早享受！

That’s All.

Double 臨老入花叢

Sat, 23 Apr 2011 22:51:46 +0800

看啊！這是我們第一本琴書，港幣五十餘 ↓

如果唔係學琴就唔會無啦啦買琴書既。無錯，兩個人仔依家展開了學琴大計。話說二月尾都有去 D 琴行睇下有乜堂岩上，但都無乜心水。原因在於 G 返工時間非常唔穩定，好難可能每堂都同一個時間上堂，佢又唔肯蝕。學琴大計當然因為咁而陷入膠著狀態，本身都諗住放棄堅持去報 T 琴行。但有一日 G 去睇醫生，又咁岩比佢見到斜對面有間琴行。咁順道去問一問，一問之下原來間琴行有 Full Time Staff，可以今堂約下堂。如是者，兩個人仔諗左陣就報左呢間琴行了。

開頭無諗過咁快學，諗住五月頭先學，但無啦啦講多兩講，老細問今個禮拜定下個禮拜開始學。一個不留神發覺原來今個禮拜得閒既時間就係報名之後個日，真係快到呢，雖則打鐵襯熱，但都未免太熱了！本身諗住 G 學先我跟上，點知變左我上先，搞笑。

輾個轉就學琴，依家暫定閒日是但一日既朝早學，下晝放工練。第一堂話咁快就到，一開鋪就學，早到無朋友。開頭以為第一堂講下口水野咁，但又唔係喎，都講得快喎。HeHeHerHer 咁就學晒十隻手指。天資聰穎，哈哈。但到 G 學既時候又係 HeHeHerHer 咁學晒十隻手指，都係天資聰穎。

話分兩頭，話說食完飯既時候 ↓

真搞笑。不過都係剛剛病完初好，醫生都話「嘩！乜咁易病既？」係啊醫生，好易病！

That’s All.

試一次講一世

Sun, 10 Apr 2011 23:36:19 +0800

不知為何，今個禮拜有好幾日都係香港仔吃飯，其實第二晚係香港仔吃飯既時候都已經 ↓

尋晚放工想去和亭，但係爆多人等位。OK，去 Pizza Hut，又係要等位。去翠華個邊看看睇下裝修完未，未裝完，真係好失落。走來又走去，嬲嬲地行陣街先吃。最後都係去返綠野 ... 真係 Never Say Never. 今日放工之後又係香港仔吃 ... 本身諗住出銅鑼灣去「盛八」吃燒烤，順便逛街買野。但又唔知點解，放工個陣好大棚人唔知等緊乜，那麼便一起吃。到了香港仔新開的 ↓

呢個鋪位既食肆真係無間得，除左用「差」來形容之外，還可以用「好差」同「超差」來說。真係好唔得 ... 但係佢既價錢又唔係平 ... ↓

落單求其、送餐又求其，但點解可以收加一服務費？Interesting。真係試一次講一世。

噢！因為 A 做唔到 B 而令到 C 發生！唉 ...

That’s All.

又摺又攝的一天。

Fri, 08 Apr 2011 01:12:14 +0800

今天的主題是「摺」和「攝」。返 Office 打點下，轉個頭去拎影印。本身心裡預算其實應該係得一箱 A3 紙。但係一去到影印店，老細話有兩箱 A3 ... 即場呆一呆，一丁人兩隻手，唔通要大力士咁一手一箱！？同老細講話不如整合埋一箱，但係已經爆滿 ... 咁無計，唯有照拎。老細幫我紮好個箱，重驚我屈到手指搵 D 紙墊一墊，可惜佢搵既紙只係廁紙 ... 打個的就回到教堂。

那麼便開始攝 ↓

真的很感激兩位不願上鏡的「女工」。我能做的只有從 Office 找些膠手套來保護雙手。本身諗住好快攝完，事與願遺，攝左成粒幾鐘。本身想報答佢地比杯雪糕佢地吃，但無人領情。謝謝你啊，像非洲飢民的「女工」，真係估唔到你會來幫手！

其實係攝乜野呢，係今個暑假既活動資料，臨盆急先鋒咁整出來 ↓

攝完過千份之後，拎返未處理既資料返 Office，再去吃個 Late Lunch。太興這個 XO 醬叉燒炒通心粉，雖然配撘有點奇怪，但好惹味。此為原本未吃之前既樣貌 ↓

吃完又打點下，之後開始摺同攝，都一樣，戴個手套去做，保護雙手 ↓

做左幾百份，收工，明天再繼續。放工同 G 逛下，見到 ↓

Woo，同之前係小朋友團契做過！呢個手工有 D 人氣咁喎 ↓

吃飯既時候，又係分享「戰利品」既時間。尋晚上堂之前係 LOGON 買左兩支 Style Fit Limited Edition 既筆桿，真係型到震，一人一支，Perfectto ↓

G 又分享因時間關係，已經扭左先既扭蛋。可惜係豆豉眼 ↓

That’s All.

三月（下）

Sat, 02 Apr 2011 09:52:59 +0800

G Series
1. 話說早一兩日 G 去學整蛋糕，我都不以為意。好啦，到佢學完整完蛋糕之後話來九龍塘比個蛋糕我睇睇。開頭我都話唔洗，一來唔想佢特登過來、二來我自己都，想話極速豬柳咁回家去。但係佢又好想比我睇，如是者就來九龍塘。個陣時我都係度諗個蛋糕應該普普通通，直至我看到 ↓

有 D 料到喎！真係似模似樣，超多讚！

2. 話說某日同 G 去赤柱，去左美利樓某間吃德國菜既餐廳吃，網上評價爆晒燈。所以都特登去試一試 ↓

兩個字：「中伏！」或者係我地唔識點菜，真係好唔掂好唔掂。啤酒豬頸肉，唔熟既！？食左會生蟲的！呢餐幾百銀，係 Tonkichi 又幾百銀，但 Tonkichi 真係好食百多萬倍！

3. Yo！齊晒。最 Good 都係個隻藍色既海棉寶寶杯 ↓

學生系列
1. 學生群組 1 - 中文科。前面兩位好努力做，後面努力畫。

2. 學生群組 2 - 生物科。和群組 1很相似。

That’s All.

齊齊放假齊齊又吃又喝

Wed, 30 Mar 2011 22:11:34 +0800

好似好耐都無放過假咁，但其實每個禮拜都有日例假放，或者可能之前趕功課感覺好似無放假咁。G 又放大假，今次佢自己安排左好多豐富既節目比自己，Good。今天一早就吃了兩件 Cake 作開始，有 Tiramisu 同 White Chocolate 既 Piece of Cake ↓

我記得好起初既時候，件白朱古力係無咁細舊 ... 呃呃地，不過味道係幾 OK既。如是者傾下計，吹下水、Hea 下就落左去銅鑼灣 Lunch。好耐好耐好耐無去 Tonkichi，今日都拿拿聲襯過左 Lunch Hour 去新既分店吃。雖然裝修新，之但係坐落覺得老店好 D D。叫了炸豬扒和炸大蝦 ↓

分店既炸豬扒好吃過老店，當然，炸蝦真係真係好好好好好好好好好味！睇下個兩隻蝦大隻到呢 ↓

吃飽飽之後就一擲千金買了個 Network Attached Storage，好似幾百萬未開頭咁。不過有用既，點會無用呢，就看看我點樣用。之後行返去 Time Square 睇戲，幾套戲之中揀左「King’s Speech」來看。用 Credit Card 有 Discount，再用埋就過期既 Cash Dollar，兩張戲票都只係 $32。就咁睇價錢真係抵到無朋友 ↓

IMDB 評呢套戲 8.4，G 說套戲悶悶地，話唔值咁多分，但係我覺得幾好喎。整件故事其實幾似「小寶與康熙」，唔劇透，值得睇的。睇完戲搵地方吃飯，想去 UCC，但排長龍，唔想排隊。之後忽發奇想，去左鼎泰豐吃，等左一陣間就有位，叫了小籠包、排骨炒飯、雲吞湯 ↓

檯與檯既距離都幾近，都逼逼地。不過勝左職員多，一位職員可能睇十張檯到，都算幾睇得緊。或者因為咁，人客都好快吃完又好快走。吃飽飽之後，就返去香港仔吃個糖水，完美 ↓

今天的確很充實，兩個人仔吃足三餐。有人會覺得吃餐飯求其去茶餐廳都得，不過我就覺得食飯唔係剩係食飯，係要傾下計吹下水。就咁齋食飯就失去左個意義咁。由於要吹水，所以平均食餐飯都要兩個幾鐘，係食到自己覺得又或者要收鋪、再或者覺得夜先會走。坐得舒服 D 傾計都傾得開懷 D 啊，唔係一定要去 D 疑似好豪既食肆吃。

最後回到家既時候 ... ↓

哈哈哈，真係打錯字！

That’s All.

Irrational Belief

Thu, 17 Mar 2011 00:35:29 +0800

Counseling Theory 裡面有一套是叫「Rational Emotive Behavior Therapy」，中文叫「理性情緒行為治療法」。REBT 當中主要用到一個 Model，幾有趣，值得分享一下。個 Model 好易記，就係「ABCDE」。假設左人既情緒唔係來自事件既發生，而係受到當中既理念影響。即係我地成日以為事件發生 (Activating Event) → 情緒 (Consequence) 。實質上應該係事件發生 (Activating Event) → 理念 (Belief) → 情緒 (Consequence) 。例如我地係街見到人唔排隊 (A) ，我地會好嬲同不滿 (C) 。當中唔係因為 (A) ，而係我地有個理念覺得排隊係公平、有秩序既 (B) 。整個流程就係 A → B → C。

無事就無事，但有事起上來其實就係當中既理念係非理性 (Irrational) 。例如，考試時期，學生們覺得自己一定要考好個試，唔係就一定無前途。當中涉及的就有個 Irrational Belief 「一定要考好個試，唔係就一定無前途」。通常點分係咪 Irrational 呢，好簡單，只要有「一定」「必須」呢 D 字眼都好大機會係 Irrational。遇到咁既情況，我地就要爭論 (Dispute) 個 Irrational Belief，例如點解考唔好個試就一定無前途，極其量只可以說無咁平坦既路，而唔係一定無前途。Dispute 既過程少不免針鋒相對，係可以好 Offense 同 Defense，所以唔係人人受落。不過當個 Irrational Belief 得以糾正過來，便會得到新既效應 (Effect) ，會由情緒既低處走過來。當然過程無咁簡單，除左認知上、行為上都要配合才能改變。REBT 講就簡單，做落係幾複雜。

A → B → C → D → E 係日常生活既自我反省都好有用。例如我可能有個 Irrational Belief 係 Banding 差既學生一定唔受教、好難相處，但其實未必架喎，讀書差唔代表佢唔受教，可能係有幾他原因。如此類推，久而久之訓練落去，個人想法會變得正面 D。可能講得唔清楚，大家去 Google Search 下就明。

That’s All.

三月（上）

Wed, 16 Mar 2011 00:00:46 +0800

話咁快三月已經過左一半，來個小小總結上半個月既事。呢期夜晚放學後間中都去翠華食，無他，一來吃綠野吃得太多，二來翠華又真係好食 D。之但係三月頭裝修，係裝修前一晚吃了個晚餐 Set。開頭以為係板上，但係諗落晚餐 Set 又無理由會用板上。同埋諗諗下都似係清埋 D 存貨所以先有扒餐晚餐 ↓

輾轉 Office 既同事先後感冒，最後我都病埋。睇醫生都睇到窮，開頭有兩聲咳都拿拿聲去睇醫生，諗住病向淺中醫。點知睇完醫生食埋藥個情況重差左 ... 好啦，諗住食一期藥唔夠，再睇多次，再吃藥。之但係情況完全無好轉，咳都咳到喉嚨損。最後轉睇大牌醫生，開頭我都以為係敏感，但醫生睇完就話其實係喉嚨有菌未清。而上次醫生開既藥就係當我哮喘咁醫，開 D抗敏藥比我，所以對我既病症原全無用。咁大牌醫生開 D 特效藥比我吃，吃完情況都改善左，不過都需要時間去復原。係醫務所見到中國古人版耶穌與彼得 ↓

復原無耐都出街密密食，先來同 G 去翠園飲個靚茶，話就話下午茶時間，但係都無話特別平。之但係幾好吃，食唔晒打包拎走，Good ↓

隔多無耐，見 D 中學生考完試，都約佢地出來飲個茶。這個是 gaymeilung 的茶局，食唔晒又打包拎走，Good ↓

好啦，又隔多一段時間。禮拜日下晝咁岩得咁橋 Kari 同 G 都得閒，去左吃 Pizza Hut，試左個 Cheesy6，係幾好味，不過唔吃得多，好膩！今次都一樣，食唔晒打包拎走，Good ↓

That’s All.

海棉寶寶 + Strong Interest Inventory

Sat, 26 Feb 2011 15:01:52 +0800

海棉寶寶
話說有晚返學前見有 D 時間，去左反斗城打得轉，見到有 $29.9 既海棉寶寶既 Puzzle，至堅既係 3D Puzzle。真係絕對超值，現在成為辦工桌上的一個小裝飾 ↓

Strong Interest Inventory
早幾日花了 $400 做一個 Online 既 Career Test，得出一份 19 頁的 Report。這份 Test 背後既 Theory 係來自 John Holland。主要根據六大興趣範籌去評定一個人既職業性向。六項類別的字頭是「RIASEC」，順序為 Realistic（實幹）、Investigative（思考）、Artistic（創造）、Social（助人）、Enterprising（遊說）、Conventional（組識），組成一個六角形，詳細各項點解就可以望下幅圖。如果最高分個三項黐埋一堆就代表個人越 Congruence，即係越一致，相反個人就會越矛盾。例如 Interest Code係 EC，即係個人興趣係做關於商業管理及有資料處理既工作，最易諗到既就係會計。又再例如，做社工又需要那些 Interest Code 呢？好簡單，係需要 Social同 Enterprising，前者大家都明點解，後者既原因是因為社工好多時要跟 Project，背後有好多管理行政工作，無 E就會做得比較辛苦。講左咁耐，看看我的 Interest Code↓

我就係「SCA」。理論上 SC 或者 SA 都有好多不同既工作，SC 可以做既係教書、HR；SA 都可以教書，特別係特殊教育，輔導員等。之但係當 SCA 夾埋既時候就唔係好多。Social既 Field 係Teaching、Healthcare、Counseling、Religion；Conventional係 Office management、Banking/accounting/finance、Government service、Business education、Software development；Artistic係 Writing、Entertainment、Commercial or fine arts、Music。我既興趣要份工有得時常與人接觸得黎又有 D 數字、資料處理、Plan 下，同時又要有機會發揮一下創意。唔怪得之我會做依家份工 ... 其實依家份工都真係幾配合我興趣，可惜世事無野係咁完美 ... 個 Report 都建議左幾項岩我興趣既工種，有Employee benefits、School counseling、Nursing、Customer service、Hospital admissions、Systems training。

除此之外，個 Report 都有寫我既 Working Style，都好詳細 ↓

先看 Work Style，我鍾意每隔一段時間就見返同一堆人。再看 Learning Environment，這樣也解釋得到點解我會繼續返學讀書。Leadership Style 也很有趣，可以看看。最後最後，整份 Report 既 Summary，很簡潔也很準確 ↓

Strong Interest Inventory 既 Debrief 有多少心理學背景就會好 D，所以打算找大學既 Career Consultant 去傾傾。除左呢個貴 Test 之外其實有個平 D 都係跟據 John Holland 既理論去支持，叫Self-Directed Search，Online 做大約係 $50。個幾個 Interest Code 重要，之但係最重要既都係 Debrief。

That’s All.

山頭火 + 好又一餐唔好又一餐 (II) + NBA Jam

Wed, 23 Feb 2011 21:45:46 +0800

山頭火
話說又到一個禮拜一日既 Day-Off，早幾日見到 G 去盛八食堂吃拉麵。細心諗一諗原來都好耐無吃過「似樣」既拉麵，想話去食返碗。如是者就諗住去太古城既「山頭火」吃碗拉麵。原來舊三越個位已經起左咁高既大廈 ↓

話咁快就人座，有張聲稱由旭川本店贈送過來唔知點稱呼的「布」。泡菜真係無孔不入 ↓

叫左一碗鹽味同麵豉味拉麵，加件吉列豬扒同炸蟹忌廉餅 ↓

拉麵味道和元祖旭川店吃的差唔多，都好好味。之但係塊肉就爭好遠，係旭川吃個塊係比到我地「未試過咁好食」既感覺，今次就無了。個蟹餅都唔錯，但係塊豬扒完全唔掂，$50 一件，真係超唔值。吃完之後係吉之島逛左陣，有人滿載而歸！如是者啟程回家，先去金鐘，再就返去香港仔買 Mon 貼，順道去左幾間琴行問學琴既事，希望四月中開始學琴。

好又一餐唔好又一餐 (II)
有時放工會莫名其妙的肚餓，順道會去麥仔買個 $20 餐，都真係抵。耐唔中 Lunch 會去吉野家吃牛汁細雞飯。呢期 OK 鍾意食豆腐花西米露，簡稱「白白」。最後，夜晚返學前有 D 熱野食下個人醒神 D，差唔多次次都係麥仔，爭在係食乜野 ↓

NBA Jam
等唔到佢特價，USD$4.99 都照買！話咁快就用 Celtics 完左個 Classic Campaign ↓

That’s All.

好又一餐唔好又一餐 + 街霸

Tue, 15 Feb 2011 02:17:56 +0800

好又一餐唔好又一餐

好多時一個人食都係是是但但，以下就係近期吃個的東西。依家夜晚上堂通常剩係吃一個麵包，或者有時間鬆動 D 會去麥仔買多少野吃。左邊的是上週二晚吃的一小片年輪蛋糕。少不免閒時都會去「小蜜蜂」嗡嗡嗡，右邊便是 G 的隨手拍，OK 迷幻 ↓

呢期都想話打一篇關於食乜既 Blog，之但係好多時差唔多食晒先醒起，搞到核核突突咁。有時興起會食麥仔早餐；心血來潮會同 G 去吃元氣 Tea；有時出開銅鑼灣會順便買份燒餅 + 章魚燒；間中一個人都會去大快活買外賣回 Office 吃↓

自從銅鑼灣間 Gindaco 執左之後，好耐都無機會吃好食既章魚燒了，要食就要特登去太古城。Sogo 地庫個間真係無得比！話分兩頭，呢期夜晚無飯食有新花款。就係襯下晝時間 Call Pizza Hut 買外賣自取，放工個陣去拎，夜晚臨食前整返熱。只係三十幾蚊，真係抵到無朋友。

街霸

放學回家既時候，係車上花了點時間玩街霸。有 Shortcut Key 真係非常方便！唔洗似家用版咁係咁轉個 Stick。Clear 了蘇聯佬同軍佬！之但係，格鬥 Game 真係唔係 My Favourite，玩得勁屎 ↓

我等緊 IPhone 既 NBA Jam 做 Discount！

That’s All.

維倫泰（下）之去醫院

Mon, 14 Feb 2011 00:08:25 +0800

再來一次「維倫泰」。先來朝早黐黐貼貼，又來一幅 Photo Wall ↓

晏晝同學生吃個開學便飯，認識了新面孔。另外有位男孩子被誤認為「阿妹」，哈哈，事出必有因，有要動點想像力將之前既事聯想下。如是者好快就吃完飯，飯後執執野、打點下就收工，撘小巴往醫院去。

唔係話有病去醫院，或者都有病不過暫時唔知點醫。快快手去 Canteen 搵個位坐底，如是者就對住碌竹 30 分鐘 ↓

期間打 Street Fighter IV 消磨時間，蘇聯佬 LIKE，係咁攬人 ↓

如是者終於等到 G 放工，同埋佢同學「阿文阿迪」一起 Tea 下。有 Starbucks 既檸檬撻同藍梅芝士蛋糕，係幾好味喎，有員工價，Like ↓

最後最後，襯 G 唔留意既時候就放左盒朱古力過佢。當佢發現既時候，我都準備睏晏覺了！

如是者，「維倫泰」也差不多過了。繼續要相親相愛！當一個人無聊既時候，創意便會萌生。也可以說為「無路捉」，真係估唔到。

That’s All.